- Flytið vindmyllurnar til havs

Jón Kragesten, limur í Føroya Náttúru- og Umhvørvisfelag, ynskir grøna orku, men hann heldur ikki, at vindmyllur er besta loysnin.

- Tað hevði verið munandi betri við vindmyllum á sjónum. Men inntil tá, mugu vit liva við at síggja nakrar vindmyllulundir um landið, sigur hann.


28 vindmyllur í einum øki
Sambært útbyggingarætlanini, sum Ingilín D. Strøm, landsstýriskvinna í umhvørvismálum, legði fram týsdagin, skal ein av teimum fimm, nýggju vindmyllulundunum setast upp á Glyvrafjalli í Eysturoynni.

Vindmyllulundin verður 25 megawatt og helst koma at standa eini fimm ella seks risastórar vindmyllur í økinum.

Men henda vindmyllulundin verður ikki tann einasta í nærøkinum. Í oktober í fjør kunngjørdi Effo, at felagið fer at byggja eina orkulund á vestursíðuni í Lambavík. Talan er um eina risastóra orkulund, sum verður 100 megawatt, also fýra ferðir størri enn tann, sum skal setast á Glyvrafjalli. Í Eysturlund, sum sambært Effo fer at kosta millum eina og hálva aðru milliard krónur, koma at standa 22 risastórar vindmyllur.