OyL 2027: Føroyar til reiðar at trýsta á knøttin

Oyggjaleikirnir koma aftur til Føroya í 2027, og umstøðurnar at hava leikirnar eru sera góðar. 

Tað er niðurstøðan hjá altjóða oyggjaleikanevndini, IIGA, sum hevur verið í Føroyum á eftirlitsvitjan síðstu dagarnar.

 - Føroyar eru meir enn til reiðar, sigur formaðurin í IIGA, Jörgen Pettersson.

 - Føroyar eru í tí góðu støðu, at hava umstøður til ítrótt, sum munnu teljast ímillum tær bestu, sum vit hava, í oyggjaleikafamiljuni.

Leikirnir koma heim

Jörgen Pettersson er úr Álandi og spældi á flogbóltslandsliðnum á fleiri av fyrstu Oyggjaleikunum - eisini teimum í Føroyum í 1989. Hann fegnast um, at leikirnir nú koma til Føroya fýra ár fyrr enn upprunaliga ætlað, eftir at Ynys Môn tók sítt boð aftur. 

 - Vit koma onkursvegna heim aftur, nú Føroyar aftur vera vertir fyri Oyggjaleikunum, og eg fegnist um, at Føroyar tóku ábyrgd og bjóðaðu seg fram, sigur formaðurin í IIGA.

Nú ræður um hjá føroysku fyriskiparunum at tryggja innivist til tey mongu túsund, sum koma til leikirnar, og annars fylgja við, hvussu kappingarnar eydnast á Orknoyggjunum, har leikirnir vera næsta summar, sigur formaðurin.