Samuel: Hesum havi eg bíðað leingi eftir

HB-verjuspælarin Samuel Chukwudi fegnast um at vera aftur á A-landsliðnum fyri fyrstu ferð í hálvtannað ár. Hann er sloppin av við knæskaðan, og nú vil hann hava fast pláss

Hans Erik Danielsen / FSF

Í miðdeplinum: Samuel Chukwudi er glaður fyri at vera við aftur á landsliðnum

Símun Christian Olsen

27.05.2024 - 12:13

Samuel Chukwudi er við aftur á fótbóltslandsliðnum fyri fyrstu ferð í hálvtannað ár, og nú er stinni HB-miðverjin til reiðar at spæla um fast pláss á liðnum.

- Hetta er ordiliga deiligt, og eg havi bíðað leingi eftir hesum, segði Samuel Chukwudi.

Stórtalentið, sum spældi fast í HB-miðverjuni longu sum 17 ára gamal undir danska venjaranum, Jens Berthel Askou, hevur verið darvaður av knæskaða leingi. Í ár hevur hann kortini verið á vøllinum í øllum 11 landskappingardystunum hjá HB.

- Í fjør sá tað nokk so svart út við skaðanum hjá mær. Eg visti ikki ordiliga, hvat fór at henda, og hvat eg skuldi gera, tí tað var ikki nógv sum riggaði, men í ár hevur tað riggað, og eg eri komin fyri meg, so tað er ordiliga gott, segði miðverjin í tíðindafundi fyrrapartin.