Jóan Jakku Guttesen var egin til tað síðsta

1. mars spældi Jóan Jakku Guttesen, saman við Føroya Symfoniorkestri, fyrstu konsertina nakrantíð í nýggju stórhøllini við Tjarnir í Hoyvíkshaganum frammanfyri 3000 fólkum. 

Stórfingna konsertin gjørdist samstundist ein tann síðsta hjá einum av stovnarunum av kenda bólkinum Tinganest. 

Sunnudagin andaðist Jóan Jakku Guttensen, 76 ára gamal, eftir stutta sjúkralegu. 

Harvið hevur ein av upphavsmonnum til Vágasound válað heim eftir niðara vegi í Sørvági fyri seinastu ferð. 

Sorgblítt

Knút Háberg Eysturstein, tónleikaførðingur og Phd-lesandi á Fróðskaparsetri Føroya, heldur, at tað er sorgblítt at noyðast at staðfesta, at vit ongantíð aftur sleppa at síggja og hoyra Jóan Jakku Guttensen á palli. 

"Jóan Jakku Guttesen var egin til tað síðsta. Tú vart ongantíð í iva, hvør Jóan Jakku Guttesen var tónleikaliga."

Jóan Jakku Guttesen hevur myndað føroyska tónleikin í ein mansaldur. Sangir sum "Upp á tá", "Vágagellan", "Annan sang", Síðsti dansur" og nógvir aðrir eru allir vorðnir fólkaogn. 

Berligt stílmedvit

Í stíli er tónleikurin okkurt slag av fólkapoppi, men ljómurin er serstakur. Vágasound, hevur tað verið kallað.

"Ljóðið liggur í dialektini, ið sungið verður á, men eisini í tónleikinum, sum bæði er altjóða, staðbundin og bygdasligu um eina leið," heldur Knút Háberg Eysturstein

Hóast ljóðmyndin kann tykjast berlig, men undir øllum bylgist stórt nærlagni, stílmedvit og veingjað poetiskt flog.