Viðareiðisbergholið stongt í óásetta tíð

Í gjár var Viðareiðisberholið stongt eftir at smágrót var komið niður á vegbreytina. Og tað kunnu gott ganga fleiri dagar, áðrenn bergholið verður opin aftur.

- Vit vita ikki enn, hvussu umfatandi arbeiðið verður, tað mugu vit síggja, sigur Árni Jacobsen, økisleiðari hjá Landsverki.

Kringvarpið spurdi um at sleppa inn í bergholið at filma, hvussu tað sær út í tunlinum, men vit fingu ikki loyvi til tað. Vit hava tó fingið nakrar fáar myndir frá Landsverki.

20 metrar long riva

Tað var í 2016, at Viðareiðisbergholið lat upp. Tað var Articon, ið gjørdi bergholið. Í 2019 var bergholið kannað av Rambøl, men tey høvdu onga viðmerking.

Viðingar eru ikki fegnir um, at teir nú mugu koyra eftir gamla Viðareiðisvegnum.

Bergholið er 1900 metrar og rivan er umleið 1400 metrar inn frá Hvannasundssíðuni. Rivan er umleið 20 metrar long.

Rivan er eftir øllum at døma rættiliga álvarsom, tí í nýggjari tíð er einki berghol í Føroyum stongt av líknandi orsøk. Júst hvat verður gjørt, vil Landsverk tó ikki siga so nógv um í løtuni.


Stongt í fleiri dagar

Landsverk sigur í kvøld, at nakað av leysum gróti og betongi er tikið niður í dag, og nú skal loftið tryggjast.

Landsverk sigur eisini, at tað fara at ganga fleiri dagar, til bergholið letur upp aftur. Hvussu leingi er tó ógreitt.