Tað grør um gangandi fót á Sandi

Í løtuni búgva 550 fólk í Sands kommunu, og tað eru 27 fleiri enn fyri einum ári síðan.

Tað er eftirspurningur eftir grundstykkjum á Sandi, og eitt byggiklárt grundstykki á Sandi kostar umleið 300.000 krónur. 14 grundstykkir eru eftir í nýggju útstykkingini.

Fleiri barnafamiljur leita sær til Sands, og tað setur krøv til barnaansingina. Barnagarðurin á Teiginum hevur tænt fyri seg, og skjótt verður flutt í nýggjan barnagarð uppi á Ryggi.

Vøggustovubørnini eru flutt inn í nýggja barnagarðin í dag, men tað er ikki heilt klárt hjá barnagarðsbørnunum at flyta inn, tí enn manglar økið rundanum nýggja barnagarðin at gerast, men Anita Sigurðsdóttir, dagstovnaleiðari, vónar, at klárt verður hjá barnagarðsbørnum at flyta inn í nýggja barnagarðin í summar.

Samanlagt verða tað pláss fyri 50 vøggustovubørnum og 50 barnagarðsbørnum.

Anita Sigurðsdóttir merkir størri áhuga frá barnafamiljum at seta búgv á Sandi, tí javnan spyrja foreldur, hvørji útlitini eru fyri, at fáa børn á stovn á Sandi.

Sum er, hevur tað verið bíðlisti at fáa vøggustovubørn á stovn, men við nýggja dagstovninum er eingin bíðilisti.

Men tað er ikki heilt bíligt fyri eina kommunu sum Sands kommuna at gera íløgu í nýggjan barnagarð, men hóast tað, so verður skattaprosentið í Sands kommunu ikki hækkað. Skattaprosentið í kommununi er 20,75 prosent.