Elinborg tilnevnd til fimm FMA-virðislønir og Jasmin Mote til fýra

Tíðindafundur var í Norðurlandahúsinum í dag, har Tónleikasamband Føroya almannakunngjørdi tey tilnevndu til ársins FMA-virðislønir.

Tiltakið er tann stóra tónleikahendingin hesa tíðina á árinum, ikki minst hjá teimum tilnevndu, sum hvør í sínum lagi eru errin av tí heiðrinum.

Tað byrjaði við, at dómararnir høvdu 43 heildarútgávur og 95 stakløg at velja ímillum, men tá teir høvdu verið ígjøgnum ta fyrstu sáldingina, vóru tey tilnevndu funnin. Fimm í hvørjum av teimum átta bólkunum, og so koma fimm servirðislønir afturat, har tað bara er ein tilnevndur, nevniliga vinnarin.

Nú skulu dómararnir so ígjøgnum teir átta bólkarnar enn einaferð, og tá tað er liðugt eru vinnararnir funnir. Tað vera teir, sum verða kunngjørdir, tá tiltakið verður í Norðurlandahúsinum 6. mars.