Landsverk skal ikki byggja land longur

Landsverk hevur mist leiklutin sum almennur byggiharri.

Tað var seinnapartin í gjár at stjórin á Landsverki, Marjun Weihe Thomassen, fekk fráboðan frá Vinnumálaráðnum um, at Verkætlanardeildin, har 18 fólk starvast, skal niðurleggjast. 

Á Landsverki hevur verið kreppufundur um málið í morgun, men hvørki stjórin ella deildarleiðarin á Verkætlanardeildini, Sigurð Ó. Vang, vilja gera samrøðu við Dag og viku um málið í dag.

Í tíðindunum á døgurða segði Jacob Vestergaard, landsstýrismaður í Vinnumálum, at hann hevur mist álitið á Landsverki í samband við bygging.  Tað er orsøkin til at byggiverkætlanir skulu flytast til aðalráðini.

Stjórin á Landsverki, Marjun Weihe Thomassen, segði seinnapartin í stuttum skrivi, at hon harmast um mista álitið, men at talan er um eina politiska avgerð, sum tey sjálvsagt fara at virða.