Tingmaður undrast á raðfestingar

Johan Dahl í Sambandsflokkinum vil nú hava at vita, hví ongar kanningar verða gjørdar av kappingarstøðuni í fiskivinnuni.

Hann spyr, um kappingarlógin og Kappingareftirlitið eisini fevna um vinnuliga virksemið í fiskivinnuni, og um landsstýrismaðurin ætlar at leggja uppskot fyri tingið, sum tryggjar, at lógin og fyrisitingarreglur eisini fevna um fiskivinnuna.

Johan Dahl sigur, at Kappingareftirlitið hevur bygt upp eina siðvenju at kanna kappingina í ávísum vinnugreinum og fyritøkur, sum virka á føroyska marknaðinum. 

Undrast á raðfestingina

Ljós verður ikki varpað á kappingarfortreytir á útboðssíðuni í stórum og týðandi vinnugreinum og á fyritøkur, ið selja vørur á útlendska marknaðinum.

Johan Dahl sigur, at henda raðfesting er ógvuliga løgin, serliga tá politiski myndugleikin útlutar veiðiloyvi, og samstundis vil hava lønsemi og virðisøking í hesi vinnugreinini. 

Henda skipanin avlagar kappingina. Johan Dahl heldur, at tað átti havt serligan áhuga hjá Kappingareftirlitinum at kannað júst veiðiliðið í fiskivinnuni.