Fara at krevja stórt endurgjald

Jógvan Martin Ferjá, reiðari á Norðhavinum, sigur, at endurgjaldið, sum reiðariíð fer at krevja, er ikki roknað út enn, men tað verður stórt, sigur hann.

Reiðariið hevur endurgjaldskrav aftur til 7.mars í 2016. 

Jógvan Martin Ferjá sigur, at eitt er at missa rættin at fiska, bæði undir Føroyum og uttanlands, men teir sluppu heldur ikki at bjóða á uppboðsølum og kundu ikki søkja um menningarkvotur. 

Teir sluppu heldur ikki at fiska fyri onnur.

Hevur ikki sæð fiskiloyvini

Jógvan Martin Ferjá hevur ikki sæð fiskiloyvini, sum Norðhav nú fær, so hann veit ikki, um tey bara eru galdandi fyri 2020, ella, um fiskurin, teir hava mist hini árini, er við.

Tá endurgjaldskravið er gjørt, verður tað latið Fiskimálaráðnum, sum í Føroya rætti varð dømt at hava endurgjaldsskyldu.

Fæst ikki semja um endurgjaldið, verður farið í Føroya rætt við tí.

Norðhavið er annars leigað alt hetta árið. Men leigusáttmálin kann sigast upp, og uppsagnarfreistin er ein mánaður.

Avgerð er ikki tikin um tað enn, sigur Jógvan Martin Ferjá.