Írska stjórnin lagt frá sær

Írski forsætisráðharrin, Leo Varadkar, boðar frá, at stjórnin leggur frá sær, men hann verður sitandi sum forsætisráðharri, til ein nýggj stjórn er skipað.

Val var í Írlandi 8. februar, men eingin flokkur fekk nóg mikið av atkvøðum til at fáa valdið einsamallur, og tí er neyðugt við meira enn einum flokki í stjórn.

Í gjár skuldu so tinglimirnir atkvøða um, hvønn teir vilja hava sum forsætisráðharra. 

Kravið er 80 atkvøður, men Varadkar fekk bara 36 atkvøður.

Leiðarin í Sinn Fein, Mary Lou McDonald, fekk flestar atkvøður, men 35 færri enn tað, sum krevst.

Tí skal atkvøðast einaferð aftrat, og tað verður 5. mars, skriva AFP og Ritzau.