Hjálparpakki tvey kunngjørdur í dag

Klokkan 11:00 í dag verður hjálparpakki tvey kunngjørdur á tíðindafundi. Á fundinum vera landsstýrisfólkini Jørgen Niclasen, Helgi Abrahamsen og Elsebeth Mercedis Gunnleygsdóttir.

Sambært uppskotinum um hjálparpakkan fáa fyritøkur upp í 80.000 krónur um mánaðin úr landskassanum í tríggjar mánaðir.

Men ikki treytaleyst. Treytirnar eru, at stjóralønin ikki fer upp um 600.000 krónur í ár. Og einki vinningsbýti má latast í trý ár.

Samanbera annan ársfjórðing

Grundarlagið er umsetningurin í øðrum ársfjórðingi í ár, sum verður samanborin við umsetningin annan ársfjórðing í fjør. 

Vísir tað seg, at umsetningurin næstu tríggjar mánaðirnar, tað er í øðrum ársfjórðingi,  minkar, sammett við sama tíðarskeið í fjør, so er landskassin til reiðar at lata stuðul til tað. 

Stuðulin verður 75 prosent av mista umsetninginum, tó í mesta lagi 80.000 krónur um mánaðin í tríggjar mánaðir.

Formansskapurin fund í dag

Ein annar stuðul er til fólkapensjónistar, sum framvegis arbeiða, men eru sendir til hús. Tey fólkini fáa ongar pengar frá Als, sum støðan er nú. Men hetta verður broytt í hjálparpakka tvey. 

Formansskapurin hjá løgtinginum hevur fund í dag um løgtingsarbeiðið. Ikki er greitt enn, nær tingfundur verður.

Vanliga skulu uppskot vera hjá Løgtingsskrivstovuni tríggjar dagar fyri framløguna. Men í serligum førum kann hendan freistin styttast niður í tveir tímar.