Óvist um allir dystirnir verða spældir

Føroyskur hondbóltur hevur ligið stillur í næstan ein mánað. Í Hondbóltssambandinum hava tey enn vón um at fullføra kappingarnar í bestu kvinnu- og mansdeildini.

Men um tær føroysku hondbóltshallirnar ikki lata upp fyri 14. mai, verða eingir hondbóltsdystir afturat spældir hetta kappingarárið.

Arbeiða við trimum møguleikum

Hondbóltssamband Føroya arbeiðir í løtuni við trimum ymiskum møguleikum og tíðarrammum, alt eftir nær feløgini sleppa inn í hallirnar aftur.

Um hondbóltshallirnar í Føroyum lata upp í apríl mánað, verður ikki stórvegis broyting í kappingarleistinum. 

Men hendir tað, at feløgini ikki sleppa inn í hallirnar fyrr enn í mai mánað, verða størri broytingar, sigur Gunn Ellefsen, forkvinna í Hondbóltssambandi Føroya.

Feløgini eru spurd

Tað kann sostatt enda við, at føroyska hondbóltskappingin skal avgreiðast upp á eitt vikuskifti síðst í mai. Enn er tó óvist, hvussu hetta verður lagt tilrættis, sigur Gunn Ellefsen.

Føroysku hondbóltsfeløgini hava verið við til at avgera, hvussu endin á kappingarárinum skal verða. Og forkvinnan í HSF væntar eina breiða semju, tá endaliga avgerðin verður tikin.

Feløgini fáa tvær vikur at fyrireika seg í, frá tí at hallirnar lata upp, til fyrsti hondbóltsdysturin verður spældur.