Sjúrðarberg skrásettur í Føroyum

Sjúrðarberg er nú skrásettur í Føroyum. JFK Trol hevur keypt trolaran fyri 2,5 milliónir evrur, góðar 18,6 milliónir krónur.

Sjúrðarberg er gamli Skálafall, Beinir og Akraberg, og hann er bygdur á Skála í 1987. Men trolarin varð seldur av landinum í 2006.

Hálvthundrað fólk við skipinum

JFK Trol hevur keypt skipið frá einum reiðaríi í Lettlandi, men skipið, sum kallaðist Dorado, var skrásett í Póllandi.

Sjúrðarberg skal fiska kongafisk í Irmingarhavinum og í altjóða sjógvi norðan fyri Føroyar og tosk í Barentshavinum. Sjúrðarberg skal saman við Gadusi fiska kvotuna hjá JFK Troli til nýggi Gadus kemur um tvey ár.

Eftir ætlan fer Sjúrðarberg til fiskiskap í august. Hálvthundrað fólk vera við skipinum. Sambært heimasíðuni marinetraffic.com liggur Sjúrðarberg í Cuxhaven í Týsklandi.