Fyrrverandi spanskur kongur fluttur av landinum

Fyrrverandi kongurin í Spania, Juan Carlos, er fluttur av landinum. Tað hevur hann boðað soni sínum, Felipe kongi, frá, upplýsir spanska kongshúsið.

Juan Carlos sigur, at hann hevur tikið avgerðina, so tað verður lættari hjá Felipe at røkja sínar skyldur sum kongur.

Tað er ógreitt, hvagar 82 ára gamli fyrrverandi kongurin er farin, men hann er longu farin av landinum, skriva spanskir miðlar.

Kanna leiklutin í einum sáttmála

Í summar kom fram, at ein ákæri í hægstarætti í Spania er farin at kanna Juan Carlos og leiklut hansara í sambandi við ein sáttmála, sum varð gjørdur við Saudiarabia um snartok.

Ákærin kannar, sum Juan Carlos kann rættarsøkjast fyri mutur, ella um órinið - immuniteturin - vardi hann til juni 2014, tá hann legði frá sær sum kongur.

Eitt sveisiskt dagblað skrivar, at hann fekk umleið 100 milliónir dollarar, ella 650 milliónir krónur í okkara peningi, sum eftir øllum at døma standa í einum banka í Sveis.

Vísir skuldsetingum aftur

Advokaturin hjá fyrrverandi konginum hevur fleiri ferðir víst skuldsetingunum aftur.

Seinastu tíðina er umdømið hjá spanska kongshúsinum versnað munandi, og vinstrahalli flokkurin, Podemos, hevur kravt, at fólkaatkvøða verður um framtíðina hjá kongsveldinum.

Juan Carlos gjørdist kongur í Spania, tá fyrrverandi valdsharrin í landinum, Francisco Franco, doyði í 1975.