Putin: Russland fer at hjálpa Hvítarusslandi

Russiski forsetin, Vladimir Putin, sigur, at Russland fer at senda politihermenn til Hvítarusslands, um tað verður neyðugt.

Tað sigur Putin í samrøðu við almenna russiska sjónvarpið, og tað verður tikið sum ein greið ávaring til vesturheimin.

Putin leggur aftrat, at viðurskiftini í Hvítarusslandi eru um at gerast vanlig aftur, og tí verður eingin hjálp send til Hvítarusslands í løtuni.

Greið tekin

Boðini verða tikin sum eitt tekin til vesturheimin um at halda seg burtur úr Hvítarusslandi, tí annars verður russiskir politihermenn sendir til Hvítarusslands, siga serfrøðingar.

Tað var forsetin í Hvítarusslandi, Aleksandr Lukasjenko, sum bað Russland um hjálp, og Putin sigur seg verða noyddan at gera tað, um tað verður neyðugt.

Samstundis siga eygleiðarar, at Vladimir Putin vil hava ávirkan á gongdina í Hvítarusslandi, men at hann hevur einki ímóti at sleppa av við Lukasjenko, forseta.