Byggisamtyktin fyri Fossdalsgjógv aftur í býráðnum

Málið um at broyta serstøku byggisamtyktina fyri Fossdalsgjógv við Velbastað hevur verið í Kirkjubøar- og Velbastaðarnevndini, og er nú komið aftur í býráðið. 

Eyðfinnur í Búðini og Eyðbjørn Gaard mæla staðiliga frá at taka undir við tilmælinum um at broyta byggisamtyktina. 

Teir siga, at atkoman gjøgnum Velbastað, á Roykheyggi, er ikki nøktandi. 

Umhvørvisliga er eisini talan um at gera seg inn á óspiltu nattúruna. 

Veðurviðurskiftini eru sera ring í Fossdali og í Fossdalsgjógv. Og harafrat fer hetta at hava fíggjarligar avleiðingar fyri festaran staðnum.

Annika Olsen, borgarstjóri, tekur undir við tilmælinum. Annfinn Brekkstein atkvøður blankt.

Koks søkt um byggiloyvi

Matstovan Koks hevur søkt um byggiloyvi í Fossdali á Velbastað. Men áðrenn byggiloyvi kann latast, má serstaka byggisamtyktin fyri Fossdalsgjógv broytast.

Umsitingin og Byggi- og býarskipanarnevndini hjá býráðnum mæla til at broyta byggisamtyktina.

Men treytin er, at avvarðandi myndugleikar geva loyvi.

Málið er a skránni fyri býráðsfundin í kvøld.