Erla Kongsdóttir aftur í sigling um Nólsoyarfjørð

Erla Kongsdóttir fer nú aftur í sigling um Nólsoyarfjørð.

Hon byrjar siglingina sunnumorgunin.

Erla Kongsdóttir siglir eftir somu ferðaætlan, ið Ternan hevur siglt, og fer at sigla eftir, sigur Strandferðslan.

Vilja hava somu fráferðartíðir

Orsøkin til, at Erla Kongsdóttir fer at sigla eftir ferðaætlanini hjá Ternuni er tann, at ferðafólk vilja hava somu fráferðartíðir úr Nólsoy fyri at verða í Havn og í Nólsoy til eitt nú skúla- og arbeiðsbyrjan, umframt at náa býarbussarnir í Havnini. 

At ferjurnar nú sigla eftir somu ferðaætlan, hevur við sær, at Erla Kongsdóttir fer at sigla færri túrar, so manningin kann halda lógarásettu hvílitíðina, sigur Strandferðslan.

Ein nýggj ferðaætlan er gjørd fyri Erlu Kongsdóttur, og hon verður send til hoyringar eftir páskir. 

Ferðaætlanin hjá Erlu Kongsdóttur á páskum er eisini tann sum hjá Ternuni.

Dregur út

Ætlanin var, at Ternan skuldi fara aftur í sigling í páskavikuni, men klassingararbeiðið dregur út, og nú er greitt, at hon fer ikki sigling aftur fyrr enn í fyrsta lagi eftir hálvan apríl, upplýsti Jørgen Niclasen, landsstýrismaður í samferðslumálum, í tinginum í vikuni. 

Ferðaætlanin um Nólsoyarfjørð sæst her