Nýggj gransking: HPV-koppsetingin riggar

Nýggj gransking vísir, at talið á tilburðum av lívmóðurhálskrabba millum kvinnur, yngri enn 20 ár, sum eru koppsettar fyri HPV, er minkað 86 prosent í Danmark, síðani man byrjaði at koppseta í 2006.

Umleið 900.000 kvinnur í aldrinum 17-30 ár vóru við í kanningini og umleið 40 prosent av hesum kvinnunum vóru koppsettar fyri HPV. 

Úrslitið vísti, at millum kvinnur, ið vóru koppsettar, áðrenn tær fyltu 17 ár, vóru 86 prosent færri tilburðir av lívmóðurhálskrabba, ið mun til tær, ið ikki vóru koppsettar. 

Eisini vísti úrslitið, at vandin fyri at fáa lívmóðurhálskrabba hjá kvinnum, sum vóru koppsettar sum 17-19 ára gamlar, var minkaður 68 prosent.

Koppsetingin fyri HPV var fyrstu ferð góðkend og tikin í brúk í 2006. Lívmóðurhálskrabbi hevur langa tíð um at menna seg, og tí hevur tað ikki borið til at staðfest virknaðin fyrr enn nú. 

Ókeypis koppseting

Í Føroyum er ókeypis at verða koppsettur fyri HPV.

HPV- koppsetingin verjir móti Human Pappiloma Virus. Hetta virusið er orsøk til ymsar sjúkur so sum lívmóðurhálskrabba, krabba í hálsinum og kynsvortir. 

Gentur fáa ókeypis koppseting, um tær eru millum 12 og 27 ár, og dreingir fáa ókeypis koppseting, um teir eru millum 12 og 17 ár. 

Kelda: Ríkissjúkrahúsið og kommunulakni.fo