Metnógv fólk kring heimin roykja

1,1 milliard fólk roykja, og tað er meir enn nakrantíð áður. Seinastu níggju árini er talið av roykjarum vaksið við 150 milliónum. Tað sigur ein kanning, sum er almannakunngjørd í læknatíðarritinum Lancet.

Sambært kanningini kostaði royking næstan átta milliónir mannalív í 2019, og seinastu 30 árini eru meir enn 200 milliónir fólk deyð av royking.

Byrja at roykja 19 ára gomul

Kanningin í Lancet sigur, at 89 prosent av øllum, sum byrja at roykja, verða bundin av nikotini, áðrenn tey eru fylt 25 ár. Bara fá byrja at roykja, eftir at tey eru fylt 25.

Tað er serliga í tíggju londum, at fólk roykja illa. Hesi londini eru Kina, India, Indonesia, USA, Russland, Bangladesh, Turkaland, Vietnam og Filipsoyggjarnar. Tveir av hvørjum trimum roykjarum kring heimin búgva í einum av hesum tíggju londunum.

Bara í Kina verður mett, at 341 milliónir fólk roykja. Sambært kanningini er miðalaldurin á teimum, sum byrja at roykja, 19 ár.