Bragi tók øll á bóli

Bragi við Jónu Ólavsdóttir á baki vann óvæntað kappingina í tvíspor fyri vaksin, tá kappríðingarárið endaði við kapping í Marknagili um vikuskiftið. Tey høvdu onga kapping vunnið fyrr í ár, men hesa ferð vunnu tey greitt, skrivar Føroya Ríðingarfelag.

Nummar tvey gjørdist Marengo við Halli Hansen, og á triðja plássi endaði Ronja við Zacharias R. Jacobsen, sum eisini vann føroyameistaraheitið.

Silja G. Eystberg vann kappingina Tølt, har Brynjar og Regin Johannesen vunnu FM.

Kór við Beintu P. Debes var 0.02 sekund frá føroyska metinum í skeið á 100m. Tey vunnu kappingina á degnum og samanlagt og eru tískil føroyameistarar.

Travkappingina vunnu Klettur við Mogens Wraae Olsen frammanfyri føroyameistararnar Freyr við Biritu Lútzen á baki. Føroyska ryssan Skessa við Siri S Joensen endaði á triðja plássi.