Koma neyvan ígjøgnum fyri jól

Nú eru bert 517 metrar eftir at bora í Sandoyartunlinum.

Í síðstu viku vóru boraðir 79 metrar, eftir at boritoymini rendu seg í eina gong fyrst í mánaðinum.

Teitur Samuelsen, stjóri í tunnilsfelagnum, sigur, at ferð er komin aftur á arbeiðið, nú komið fram við gongini, sum hevur seinkað arbeiðinum.

Gongin, ein gjógv, sum gongur tvørtur um tunnilin, seinkaði arbeiðinum. Tí var borað styttri fyri hvørja spreinging, og tunnilin mátti tettast so hvørt.

Nú arbeiðið hevur gingið seinni í nakrar vikur, er ósannlíkt, at borað verður ígjøgnum fyri jól, sigur Teitur Samuelsen, stjóri í Eystur- og Sandoyartunlum.