USA hevur bílagt 20 milliónir koronutablettir

Amerikanski forsetin, Joe Biden, tvífaldar bíleggingina av koronutablettum frá Pfizer og bíleggur nú 20 milliónir tablettir.

Pfizer hevur upplýst, at ein kanning staðfestir, at Paxlovid-tablettin verjir fyri álvarsligari sjúku.

Hon verjir eisini fyri omikron og kann minka um vandan fyri at verða innlagdur ella at doyggja av smittuni við 89 prosentum, um tablettin verður tikin í seinasta lagi tríggjar dagar eftir sjúkutekin, skrivar Pfizer.

Evropiski heilivágsstovnurin, EMA, góðkendi í desember Paxlovid-tablettina at brúka av neyð til serliga viðkvæmar sjúklingar í ES-londum, har nógv koronusmitta er.

Danmark hevur bílagt 50.000 Paxlovid-tablettir og Noreg 41.000.