Daniel Ortega fer undir sítt fjórða forsetaskeið

Í gjár var 76 ára gamli Daniel Ortega tikin í eið sum forseti í Nikaragua, har hann nú fer undir sítt fjórða forsetaskeið.

Samstundis var kona hansara, Rosario Murillo, tikin í eið sum varaforseti. Dóttir og sonur Ortega eru eisini sett í starv sum ráðgevarar hjá forsetanum.

Millum innbodnu gestirnar til hátíðarhaldið vóru umboð úr Venesuela, Kuba, Kina, Russlandi, Iran, Norðurkorea og Sýria.

Ortega var afturvaldur á forsetavalinum 7. november.

Valsigurin kom ikki óvart á, eftir at 40 andstøðupolitikarar, harav sjey, sum høvdu ætlað at stilla upp ímóti Ortega, vórðu tiknir og settir í fongsul.