Savnsvørðurin í Havn sagt seg úr starvi

Savnsvørðurin í Tórshavnar kommunu, Margretha Nónklett, hevur nú sagt seg úr starvi.

Margretha Nónklett hevur áður víst á ótolandi arbeiðsumstøður, orsakað av óvissu hølisviðurskiftunum hjá býarsavninum.

- Sum støðan er í løtuni, er avgerð ikki tikin um, hvat bygningurin á Frúutrøð, har býarsavnið húsast, skal nýtast til.

Tað sigur Anfinn Brekkstein, formaður í mentanarnevndini hjá Tórshavnar kommunu, í stuttari viðmerking til Kringvarpið. 

Eingin støða tikin

- Eg eri júst kunnaður um, at Margretha Nónklett hevur sagt seg úr starvi, og tað eri eg sjálvandi harmur um, sigur hann.

- Býráðsfundur hevur ikki verið, síðani savnsvørðurin segði seg úr starvi, og tí er trupult hjá mær at siga, hvat fer at henda við býarsavninum. Málið liggur í løtuni í byggi- og býarskipanarnevndini, ið skal taka støðu til, um bygningurin skal nýtast til íbúðir ella ikki, sigur Annfinn Brekkstein, formaður í mentanarnevndini hjá Tórshavnar kommunu.

 

Býarsavnið hevur hildið til í gamla elementskúlanum á Frúutrøð, men í løtuni er ógreitt, hvat fer at henda við býarsavninum.