21 fólk doyðu í russiskum álopum í Sumy

Russiskar rakettir raktu í gjár eitt íbúðarøki í býnum Sumy útnyrðingspartinum av Ukraina.

Í minsta lagi 21 fólk doyðu í álopinum, teirra millum tvey børn. 

Varauttanríkisráðharrin í Ukraina, Emine Dzheppar, skrivar á Twitter, at russisk hernaðarakfør koyrdu í gøtunum í Sumy og skutu eftir húsum, har sivilfólk búgva. Ein skúli var eisini raktur.

Sí videomyndir frá AP-tíðindastovuni, har bjargingarfólk leita í toftunum eftir álopið á Sumy í gjár.

Tvær milliónir flóttafólk

Sumy er ein av býunum í Ukraina, har nógv sivilfólk eru flutt burtur í dag, eftir at russiskar herdeildir lovaðu at leggja vápnini, meðan tey verða flutt burtur. 

Í dag fer talið á flóttafólkum úr Ukraina væntandi upp um tvær milliónir, upplýsir flóttafólkastovnurin hjá ST.

Grannalandið Pólland hevur tikið ímóti flestu flóttafólkum, fleiri enn einari millión, síðani kríggið brast á 24. februar.

Sí  video sum miðilin Nexta hevur lagt út Twitter av álopunum á Sumy:

This is what residential buildings in #Sumy look like after a night of air strikes. pic.twitter.com/z2j9Gl6A02

— NEXTA (@nexta_tv) March 8, 2022