Fótbóltslandsliðið tikið út fyrrapartin

Fyrrapartin fer landsliðsvenjarin hjá fótbóltslandsliðnum við monnum, Håkan Ericson, at kunngera teir 24 spælararnar, sum skulu við á venjingarlegu, har dystir ímóti Gibraltar og Liktinstein eru á skránni.

Føroyar spæla ímóti Gibraltar leygardagin 26. mars, og dysturin ímóti Liktinstein verður 29. mars. Venjingarlegan er liður í fyrireikingunum til Nations League-kappingina hjá UEFA, sum byrjar í juni, har Føroyar eru í bólki saman við Turkalandi, Luksemburg og Litava.

Eisini fer U21-landsliðsvenjarin, Sámal Erik Hentze, at taka út liðið, sum skal spæla EM-undankappingardystir ímóti Fraklandi og Norðurmakedónia í næstum.