ES til reiðar við nýggjum tiltøkum móti Russlandi

Uttanríkisleiðarin í ES, Josep Borrell, fordømir russisku innrásina í Ukraina og sigur, at hon er barbarisk.

Á tíðindafundi í norðurmakedónska høvuðsstaðnum, Skopje, váttar Borrell, at ein fjórði pakki við tiltøkum móti Russlandi er klárur.

Borrell sigur, at russisku herdeildirnar leypa ikki bara á hernaðarmál, men eisini á sivilmál, og vísti á, at fleiri enn 2.400 sivilfólk eru deyð, síðani russiska innrásin byrjaði.

Rakar handil og marknaðaratgongd

- Kríggið hjá Putin snýr seg ikki bara um Ukraina. Tað snýr seg eisini um trygd og støðufesti í øllum Evropa. Tað ávirkar okkum øll, segði Josep Borrell.

Fjórði pakkin við tiltøkum skal raka russiskan handil, marknaðaratgongd, limaskap í altjóða fíggjarstovnum og útflutning av marglætisvørum.

- Hetta verður enn eitt dygt slag móti fíggjarliga og samskipaða grundarlagnum fyri innrásini, segði Josep Borrell, sambært NTB.