Finnland fyrireikar umsókn um Nato-limaskap

Finnland fyrireikar nú umsóknina um limaskap í Nato.

Tað skrivar finska blaðið, Iltalehti.

Finski uttanríkisráðharrin, Pekka Haavisto, váttar fyri blaðnum, at fyrireikingar eru, og sambært blaðnum, verður umsóknin longu send í hesum mánaðinum.

Pekka Haavisto sigur við Reuters, at limalond í Nato hava sagt, at tað tekur millum fýra mánaðir og eitt ár at fáa eina umsókn góðkenda, um Finnland søkir.

Avgerðin um at søkja verður tikin næstu vikurnar, sigur Haavisto.

- Russisku álopini í Ukraina hava sett Finnland í eina støðu, har landið kann fáa brúk fyri størri verjusamstarvi, sigur Pekka Haavisto.