Lógarbroyting skal loysa ósemju um atgongd til upplýsingar

Ein ósemja millum Dátueftirlitið, Landsgrannskoðanina og Løgtingið verður loyst við lógarbroyting.

Formansskapurin í Løgtinginum hevur skotið upp at broyta lógina um Landsgrannskoðanina, so hon hevur beinleiðis atgongd til elektroniskar upplýsingar í teimum telduskipanum, sum eru grundarlag undir grannskoðanini.

Dátueftirlitið hevur gjørt av, at Almannaverkið ikki hevur loyvi at geva Landsgrannskoðanini beinleiðis netatgongd til fakskipanir sínar.

Løgtingið er ikki samt í hesi niðurstøðuni. Haðani verður staðfest, at heimildin longu er í grannskoðanarlógini.

Leggur seg út í arbeiðið

Formansskapurin sigur, at Dátueftirlitið leggur seg beinleiðis út í arbeiðið hjá Landsgrannskoðanini og forðar henni í at loysa sínar uppgávur.

Samskiftið við Dátueftirlitið hevur verið úrslitaleyst, sigur formansskapurin.

Av tí, at niðurstøðan hjá Dátueftirlitinum er vend móti Almannaverkinum, fær Løgtingið ikki gjørt so nógv við málið, annað enn at broyta lógina.

Stundir eru ikki at loysa málið á annan hátt, um Landsgrannskoðanin skal fáa framt sítt lógarálagda virksemi, sigur formansskapurin hjá løgtinginum.

Vikið verður frá øllum tíðarfreistum í Løgtinginum, so málið verður avgreitt sum skjótast. 

Almannaverkið

Av tí at niðurstøðan hjá Dátueftirlitinum er vend móti Almannaverkinum, fær Løgtingið ikki gjørt so nógv við málið, annað enn at broyta lógina, sigur formansskapurin í løgtinginum.