Dýrari at reka landbúnað

Oljuprísir, kraftfóðurprísir, kunsttøðprísir og alt annað er blivið millum 25 og 50 prosent dýrari, samstundis sum eingin politiskur vilji tykist vera fyri at rætta landbúnaðinum eina hjálpandi hond.

– Vit hava tosað við landsstýrið í mars, men har var einki at heinta, sigur Siggert Patursson, formaður í Bóndafelag Føroya, ið staðfestir, at landbúnaðurin í grannalondunum fær ein stuðul, ið føroyski landbúnaðurin ikki fær.

Bara fóðurprísurin hækkaði eina krónu 1. mai, sum er ein hækking upp á 40 prosent, so tað merkist hjá føroysku bøndunum á at kalla øllum økjum.

– Einasta, bøndurnir kunnu gera, nú alt er blivið dýrari, er at skrúva upp á prísin, tá ið vørurnar skulu seljast, sigur hann.