Danska stjórnin tíðindafund um koronustøðuna í morgin

Danski forsætisráðharrin, Mette Frederiksen, heldur í morginári klokkan 9 tíðindafund um, hvussu koronustøðan skal handfarast næstu mánaðirnar.

Tíðindafundurin fer at snúgva seg um koronustrategiina, sigur forsætisráðið í tíðindaskrivi.

Strategiin kemur samstundis sum smittutølini í Danmark vaksa,

Orsøkin er millum annað nýggja omikronfrábrigdið, BA.5, sum hevur fingið fastatøkur í Danmark.

59 prosent

Fyri tveimum vikum síðani vóru 32 prosent av øllum nýggjum smittutilburðum við BA.5-frábrigdinum, og nú er tað talið komið upp á 59 prosent.

Samstundis vænta myndugleikarnir, at smittan aftur tekur dik á seg í heyst og vetur. Tí vilja heilsumyndugleikarnir verða fyrireikaðir.

Tá ráðharrin í heilsumálum, Magnus Heunicke, var í samráð á Christiansborg fyrst í juni, segði hann, at tað er umráðandi, at landið er fyrireikað á ymsan hátt.

Tað skal eisini tryggja, at týðandi partar av samfelagnum ikki steðga upp, hóast smittutølini vaksa munandi.