Lata væl at sjóvarfalsdrekanum í Vestmannasundi

Fyritøkan Minesto, sum ger royndir við sjóvarfalsorku í Vestmannasundi, letur væl at nýggja sjóvarfalsdrekanum, sum hevur verið royndur síðani miðskeiðis í mai.

Sjóvarfalsdrekin, Íðunn, fór beinanvegin at framleiða elorku inn á netið hjá SEV, og royndin hevur higartil gingið eftir ætlan.

Í løtuni verða onkrar stillingar gjørdar á sjóvarfalsdrekanum, sum framleiðir streym á 40 metra dýpi, sigur SEV.

Umframt elframleiðsluna umfatar royndarkoyringin eisini aðra útgerð, sum til dømis tjóður og tjóðurskipanina.

Eitt upptøkutól er sett á drekan, so til ber at hava eftirlit við, hvussu tjóðrið roynist.