Grindadráp á skránni í bretska parlamentinum

Bretskir parlamentslimir fáa í dag høvi til at kjakast um grindadráp, og um fríhandilsavtalan við Føroyar fyribils skal setast úr gildi. 

Tað hendir, eftir at ein áheitan móti grindadrápi hevur fingið oman fyri 104.000 undirskriftir. Tá ið ein áheitan fær yvir 100.000 undirskriftir, verður støða tikin til, um málið skal takast upp í parlamentinum. 

Og tað verður mett, at grindadráp skal umrøðast, tí nevndin, sum varðar av málinum, hevur sett tað á skránna til eitt kjak í Westminster Hall klokkan seks í dag. 

Í tí sambandi er heitt á John Nicolson, tingmann fyri skotska loysingarflokkin SNP, um at vera talsmaður fyri uppskotinum. 

Hann hevur áður givið til kennar, at hann metir grindadráp vera djórapínsla. 

Sambært skránni er konservativa tingkvinnan Penny Mordaunt, ráðharri fyri samhandil, talskvinna fyri stjórnina.

Krevja fríhandilsavtaluna ógildaða

Stig blivu tikin til áheitanina í kjalarvørrinum av springaradrápinum í Skálafirði í fjør, tá ið 1.428 springarar vórðu hildnir til.

Í áheitanini verður víst á, at Føroyar og Bretland í 2019 undirskrivaðu eina fríhandilsavtalu, sum loyvir føroyingum at útflyta fiskavøru og laks fyri eitt virði upp á umleið 900 milliónir krónur á bretska marknaðin. 

Kravt verður, at handilsavtalan verður sett úr gildi, til føroyingar gevast at veiða hval. 

Í sambandi við, at áheitanin fekk meira enn 10.000 undirskriftir, mátti bretska stjórnin viðmerkja málið. Tann 26. oktober 2021 staðfesti bretska stjórnin, at hon tekur frástøðu frá hvalaveiðu og fer framhaldandi at heita á føroyingar at gevast við grindadrápi. Einki bleiv tó nevnt um at seta fríhandilsavtaluna úr gildi. 

Men um vikuskiftið boðaði Árni Skaale, landsstýrismaður í fiskivinnumálum, frá einum árligum veiðuhámarki á springarum.

- Tað er ikki heilt av tilvild, at uppskotið frá landsstýrinum kemur fram nú, samstundis sum bretska parlamentið fer at viðgera springaradráp, sigur Árni Skaale.