Fólk koma ov nær gosinum í Íslandi

Síðani tað fór at goysa við Fagradalsfjall á Reykjanesi í Íslandi, hava myndugleikarnir havt trupulleikar av, at fólk koma ov nær gosinum.

Nú hevur politimeistarin á staðnum gjørt av, at fólk ikki mugu hava børn við sær, sum eru yngri enn 12 ár, skulu tey til Meradalir at hyggja at gosinum.

- Fyri tað nógva eru tað útlendingar, ið koma við børnum sínum at síggja eldgosið, og tað gera tey, hóast alla kunning um, at tað ikki er hóskandi at koma hagar við smáum børnum, sigur politimeistarin.

Orsøkin til forboðið hjá politinum er vandin fyri eitrandi gassi, ið ofta liggur tættari jørðini, tí tað er tyngri enn luftin, og av tí sama vandamiklari fyri tey smáu, enn fyri vaksin.

Økið, haðani fólk kunnu eygleiða gosið, er stongt í dag vegna veður, men skal eftir ætlan lata upp aftur í morgin, skrivar Morgunblaðið.