Bretland fær nýggjan forsætisráðharra í dag

Bretland fær nýggjan forsætisráðharra í dag, eftir at Konservativi flokkurin í gjár valdi Liz Truss til nýggja forkvinnu.

Sitandi bretski forsætisráðharrin, Boris Johnson, fór í morgun úr Downing Street No. 10 við kós móti Aberdeen í Skotlandi, har hann í dag fer at hitta Elizabeth, drotning, í Balmoral-slottinum. 

Boris Johnson

Í síni fráfaringarrøðu uttanfyri Downing Street No. 10 staðfesti Boris Johnson, at "Hetta var tað."

Boris Johnson

Boris Johnson heitti í røðu síni á Konservativa flokkin um at stuðla nýggju forkvinnuni og forsætisráðharranum, Liz Truss, tí tað eru avbjóðandi tíðir í Bretlandi. 

"Hetta er ein strævin tíð fyri búskapin, ein strævin tíð fyri bretskar familjur. Nú mugu vit gevast við at stríðast politiskt innanhýsis í flokkinum og stuðla Liz Truss og hennara fólki."

Boris Johnson

Boris Johnson hevur sitið sum fyribils forsætisráðharri síðani fyrst í juli, tá hann misti undirtøkuna millum fólk orsakað av fleiri gølum, og valdi at leggja frá sær.

Boris Johnson

Boris Johnson hevur verið forsætisráðharri síðani í 2019.

Boris Johnson

Tilnevnd í Skotlandi

Liz Truss skal eisini hitta drotningina í Balmoral-slottinum í Aberdeen í dag, áðrenn hon flytur inn í stjórnarbygningin í Downing Street No. 10.

Liz Truss

Liz Truss fer eisini at halda røðu í dag, men tað verður ikki fyrr enn seinnapartin, tá hon er komin aftur til London. 

Hetta er fyrstu ferð yvirhøvur, at drotningin ikki tilnevnir nýggjan bretskan forsætisráðharra í Buckingham-slottinum í London. Orsøkin er, at drotningin ikki er so flytfør longur, nú hon er  er vorðin 96 ár.