Bráðfeingis játtanarlógin: Tað almenna kann ikki seta nýggj fólk

Tað almenna má ikki seta nýggj fólk, fyrr enn fíggjarlógin fyri 2023 er samtykt.

Í bráðfeingis játtanarlógini fyri 2023, sum løgtingið samtykti í gjár, stendur, at um tað er neyðugt, ber til at endurseta starvsfólk fyri tey, sum fara úr starvi, men ikki er loyvt at økja um starvsfólkaliðið í mun til játtanina í 2022. 

Heldur ikki mugu keypast vørur, tænastur og útbúnaður, sum ikki eru treyt fyri, at vanliga virksemið ótarnað kann halda fram.

Bara íløgur, sum er sáttmálabundnar, mugu gerast.

Eingi nýggj tiltøk

Stuðul verður bara latin til virksemi, sum bindandi tilsøgn er givin um, og til at reka alment virksemi av áhaldandi slagi. 

Í øllum førum er galdandi, at eingi nýggj tiltøk mugu setast í verk. 

Tá løgtingsval var fráboðað 5.desember í 2003 at vera 20.januar 2004, kom uppskotið um fíggjarlóg fyri 2004 ikki fyrr enn 25.mars í 2004.

Álitið hjá fíggjarnevndini kom 5.mai. Fíggjarlógin fyri 2004 var samtykt 13.mai og var lýst 17.mai í 2004.