- Tíðindi, mentan og ítróttur
ÍSF: vilja síggja orðingarnar á fíggjarlógini
![](https://kvf.fo/sites/default/files/styles/grein-ovasta-mynd/public/isfokok.png?itok=t5BIeO7x)
Ítróttur er nevndur fleiri ferðir í nýggja samgonguskjalinum, sum varð undirskrivað fyrrapartin, men føgru orðingarnar skulu síggjast aftur longu í komandi fíggjarlóg, skrivar Ítróttasamband Føroya.
ÍSF sigur seg í longri tíð hava víst á, at játtanin til føroyskan ítrótt leingi hevur staðið í stað, "hóast virksemið - bæði innanlands og altjóða - er vaksið."
Tí er avgerandi, at nýggja samgongan skrivar soleiðis, sigur ÍSF:
- Arbeiðast skal fyri at hækka rakstrarstuðulin til ÍSF og styrkja altjóða luttøku. Landið luttekur við parti av íløguni í ítróttamiðstøðir, stendur í samgonguskjalinum.
Samstundis sum ÍSF fegnast um orðini, vónar felagsskapurin, sum varðar av føroyskum ítrótti, at tey síggjast sum krónur og oyru á komandi fíggjarlógini.
- Tí í løtuni eru fleiri sambond, ið virka við undirskoti. Tað er ikki ein haldbar støða, og tørvurin á hægri játtan er sera stórur. Fólkatalið veksur jú støðugt, og tað sæst eisini aftur í íðkaratalinum. Hartil standa føroysk ítróttafólk seg støðugt betur í altjóða kappingum, og tað kostar nógv at vera við millum tey bestu, skrivar ÍSF.
Ítróttasamband Føroya fegnast um, at nýggja samgonguskjalið nevnir langtíðarætlaninar, sum ÍSF hevur lagt stóran dent á seinasta árið.