Kannar um embætisførslan hjá Kára P. Højgaard kann kannast

Landsstýrismálanevndin kannar nú, um tað ber til hjá henni at kanna embætisførsluna hjá Kára P Højgaard, nú hann er koyrdur frá sum landsstýrismaður.

Nevndin avgjørdi í vikuni at kanna, hví Kári P. Højgaard, landsstýrismaður, ikki gav tingmonnunum, Akseli V. Johannesen og Høgna Hoydali, tøl hjá Landsverki, tá teir í juni spurdu hann um Eysturoyartunnilin. Men hetta var, áðrenn løgmaður koyrdi landsstýrismannin úr starvi. Og nú er ikki vist, hvussu verður við kanningini, tí landsstýrismaðurin er koyrdur til hús, sigur forkvinnan í landsstýrismálanevndini, Sirið Steenberg.

Forkvinnan í andsstýrismálanevndini vil eisini hava aðrar spurningar kannaðar í tunnilsmálinum.

Tríggir limir

Landsstýrismálanevndin hevur tríggjar limir: Tveir úr samgonguni, sum eru Joen Magnus Rasmussen úr Fólkaflokkinum og Rósa Samuelsen úr Sambandsflokkinum. Og so Sirið Steenberg úr Tjóðveldi.

Uppgávan hjá landsstýrismálanevndini er at hava eftirlit við, at landsstýrið - tað eru løgmaður og landsstýrisfólk - útinna sítt starv á lógligan hátt. Hevur nevndin illgruna um óreglusemi í fyrisitingini hjá teimum, so kann hon krevja, at ein kanningarstjóri verður settur at kanna málið víðari.