Trygd 15 milliónir í avlopi fyri skatt

Ársúrslitið hjá tryggingarfelagnum Trygd var eitt avlop upp á 15,2 mió. kr. fyri skatt í fjør. 

Talið á fráboðaðum skaðum hevur verið umleið tað, sum var væntað við ársbyrjan í fjør, og harafturat hevur árið verið merkt av inntøkuvøkstri. Avlopið eftir skatt var 12,5 mió kr. 

Til samanberingar var úrslitið í 2021 1,7 mió kr. í halli.

- Orsøkin til stóra munin millum úrslitini er, at 2021 var merkt av lutfalsliga stórum skaðum og stórum endurgjøldum, meðan skaðarnir í 2022 vóru á einum meira vanligum stigi, sigur Trygd í skrivi sent miðlunum í dag.

Bruttoinntøkurnar frá tryggingargjøldum hjá Trygd hækkaðu 14,8 mió. kr. í 2022, og vóru tilsamans 155 mió. kr.