Veðrið: Óvanliga kaldur kavavetur

Á Eiði vórðu máld 8,3 kuldastig, í Havn 7,6 kuldastig og á Borðuni 7 kuldastig. Hetta var um náttina og um morgunin. Hetta er óvanliga kalt, eisini í mars mánað, sum vanliga er ársins kaldasti mánaði. Miðalhitin í mars er 4,4 stig (hitastig). Lægsti hiti er í miðal 2,0 stig.

Kaldur mánaður

Hesin mars mánaði hevur higartil verið óvanliga kaldur við nógvum kava. Kavin hevur ligið kring alt landið, og tað er ein vøkur sjón at síggja kavaklødd fjøll á vetrartíð, men kavin hevur ávirkað ferðsluna kring alt landið, og øll tey røsku fólkini hjá Landverki hava havt úr at gera.

Tórshavn 5. til 9. mars, 2023. Mesti hiti hevur verið 4,2 stig. Tað var 5. mars, klokkan 14. Í aðrar mátar hevur hitalagið ligið um frostmarkið og eitt sindur undir. Mynd: Veðurstova Føroya.

Mars hevði eina góða byrjan

Mars mánaði byrjaði annars væl við einum stórum hátrýsti, sum gav okkum støðugt veður við fitt av sól, men sum hátrýstið flutti seg vestureftir ímóti Grønlandi, fingu vit eitt kalt luftrák norðaneftir við kavaælingum, og hetta vetrarliga veðrið hevur verið líka síðan.

Tórshavn 9. til 13.mars, 2023. Mesti hiti er 2 hitastig. Tað var 9 mars klokkan 12. Annars hevur hitalagið ligið undir fristmarkinum alla tíðina. Lægsti hiti hevur verið 7,6 kuldastig, men hann sæst ikki á strikumyndini, tí tíðarbilini eru ikki býtt í minuttir. Mynd: Veðurstova Føroya.

Hvussu leingi fer tað so at varða?

Ymiskar veðurskipanir glímast sunnan fyri okkum, dysturin millum ta heitu og ta køldu luftina fer onkra løtu at koma sera nær okkum í Føroyum, og forsagnirnar hava fleiri ferðir víst, at lýggjari luft er ávegis, men so trokar kuldin hava vekk aftur, einaferð enn.
Vit fara tó ikki at blíva við at útseta várið. Eitt størri lágtrýstøki sær út til at vera á veg ímóti bretsku oyggjunum hósdagin. Tað fer at trýsta lýggjari luft nærri Føroyum og er møguleiki fyri at fáa hitalagið eitt sindur uppeftir so at tað verður regn og/ella vátakavi í staðin fyri kava.

Forsøgn hjá ECMWF fyri avfalli og lufttrýsti, hósdagin 16. mars klokkan 18. Mynd: Veðurstova Føroya.

Av tí at vit liggja ímillum kalda og lýggja luft, eru forsagnirnar nakað óvissar, og tað skal ikki nógv til, áðrenn vit aftur fáa eitt kalt luftrák av landnyrðingi. Men gongur alt væl, sleppa vit undan tí kalda høgættarluftrákinum, sum vit hava havt so leingi.

Kelda: Veðurstova Føroya

Kavarudding, kavablásari

Landsverk hevur úr at gera í hesum døgum við at rudda vegirnar fyri kava.