Danir í døpurhuga

"Gigantisk fiasko", "Dansk nedtur" og "Danmark taber sensationelt". 

Donsku bløðini eru ikki blíð við danska fótbóltslandsliðið, sum seinnpartin tapti 3-2 í EM-undankappingardystinum ímóti Kasakstan. 

Alt gekk annars eftir vild hjá dønum fyri steðgin, tá stórtalentið, Rasmus Højlund, við tveimum málum gav Danmark eina at síggja til trygga leiðslu. 

20 ára gamli framherjin úr Atalanta skoraði hattrikk á heimavølli í 3-1 sigri á Finnlandi hósdagin, og hann var eins væl upplagdur í Astana.



Bæði danir og kasakar vóru sum hamskiftir í seinna hálvleiki. Baktiyor Zainutdinov minkaði um munin í 73. minutti, tá dómarin dømdi eitt ivasamt brotsspark. Fýra minuttir fyri leiklok javnaði Askhat Tagybergen við langskoti, og tríggjar minuttir seinni gjørdist Abat Aimbetov hetjan á heimavølli, tá hann skoraði til 3-2.

 

Danski venjarin, Kasper Hjulmand, danski spælararhópurin, og ikki minst donsku viðhaldsfólkini vóru vónbrotin av snópisliga tapinum í Astana, og danskir miðlar eru heldur ikki blíðir.