Korona spøkir í sjúkradøgum

Fólk, sum fingu Covid 19 tíðliga, hava havt nógv meiri sjúkrafráveru enn onnur í langa tíð eftir smittuna. 

Tað vísir ein kanning, sum danska Serum Instituttið hevur gjørt. 

Nógv av teimum hava havt sokallað longcovid, ella seinárin - fyri summi hevur tað verið lættari sjúkueyðkenni í styttri tíð, meðan onnur hava hava álvarslig sjúkutekin sum meira ella minni hava gjørt tey avlamin og óarbeiðsfør. 

Statens Seruminstitut hevur kannað sjúkrafráveruna hjá 88,818 dønum í 8 mánaðir eftir koronasmittuna.

Niðurstøðan er greið. Nógv av teimum, sum fingu smittuna tíðliga høvdu nógva sjúkrafráveru, leingi eftir at tey vóru smittað og nógv meiri samanborið við tey, sum ikki vóru smittað.

Longri sjúk

4,5 prosent av teimum, sum fingu smittuna tíðliga, hava verið sjúk í meira enn fýra vikur, átta mánaðir eftir at tey hava havt korona.

1,4 prosent av teimum, sum ikki hava verið smittað, hava verið sjúk í meira enn fýra vikur. 

Anders Hviis professari, sum hevur verið við til at gera kanningina sigur, at úrslitið vísir, at fylgjurnar av Covid 19 ikki vóru mildar og yvir stutta tíð - sum nógv høvdu vónað at byrja við. 

Stórur munur er á, hvussu hart fólk vóru rakt. 

Kvinnur, eldri og fólk við ovurfiti hava havt meiri sjúkrafráveru enn menn, ung og fólk við normalvekt. 

Haraftrat eru tey, ið hava kroniskar sjúkur sum fibromyalgi, diabetes og lungnasjúkur, hart rakt.