Liðskiparin: Eg gleði meg at møta hesum liðunum

Liðskiparin á føroyska fótbóltslandsliðnum, Ásla Johannesen, er væl nøgd við lutakastið til fyrstu Nations League-kappingina fyri kvinnur, sum byrjar í september.

Føroyar komu í bólk saman við Aserbadjan, Montenegro og Kýpros, og tað er heilt okey, sigur vinstrabeinti bakkurin.

 - Eg gleði meg at møta hesum liðunum. Eg havi bert spælt ímóti Montenegro eina ferð fyrr - í 2017 - tá vit vunnu 2-1. Í síðstu undankapping stóð Montenegro seg væl ímóti Aserbadjan, so nú fara vit til verka at fyrireika okkum so væl sum gjørligt til kappingarbyrjan, sigur Ásla Johannesen.

Teir seks dystirnir í bólkaspælinum verða spældir í trimum umførum í ávíkavist september, oktober og desember. Finalurnar verða á vári 2024, skrivar FSF.

Fyri kortum setti Fótbóltssambandið nýggjan venjara, eftir at Lene Terp segði seg úr starvi. Tað verður Signe Pries Andersen, sum skal standa á odda fyri fyrstu føroysku royndini í Nations League.


Nations League í tøkum tíma

Ásla Johannesen, sum í januar skifti úr AGF til Piteå IF í bestu svensku deildini, var munandi spentari til hetta lutakastið, enn onkuntíð fyrr, tá talan hevur verið um EM og HM-undankappingar.

 - Fyri meg hevur hetta lutakastið fyri verið heldur meira spennandi, og magakenslan er betri við nýggja kappingarleistinum, sigur Ásla Johannesen.

Síðstu árini hava Føroyar verið við í undankappingum, har mótstøðuliðini hava talst millum tey bestu í heiminum. Nú kappast føroysku kvinnurnar í C-deildini í Nations League, og tað hevur við sær, at mótstøðuliðini verða munandi veikari.

 - Tað verður øgiliga spennandi og gevandi, sigur Ásla Johannesen. 

 - Vit koma at møta liðum á okkara stigi oftari, og tað eigir alt annað líka at verða gevandi fyri allar partar. Tað sama er galdandi fyri tey bestu liðini, sum oftari sleppa at møta hvørjum øðrum. Eg eri rættiliga spent, og eg gleði meg at koma í gongd.