Leiðari í Wagnerbólkinum vil taka herdeildir úr Bakhmut

Wagner-bólkurin fer at taka sínar herdeildir úr býnum Bakhmut tann 10. mai.

Tað sigur leiðarin av Wagner-bólkinum, Jevgenij Prigosjin, í einum videobroti á sosiala miðlinum Telegram.

Orsøkin er, at krútið er uppi, sigur Prigosjin og heldur fram:

"Vegna Wagner-bólkin boði eg frá, at vit noyðast at broyta støðuna hjá okkara deildum í Bakhmut. Vit taka okkum aftur til deildir hjá verjumálaráðnum, so vit kunnu sleikja okkara sár."

Hetta er ikki fyrstu ferð, at Jevgenij Prigosjin er komin við slíkum útmeldingum, sum hann síðani hevur tikið aftur, ella hava tær snøgt sagt ikki hildið. Tí er heldur ikki vist, at Wagner-deildirnar veruliga fara at taka seg aftur úr Bakhmut 10. mai.

Bakhmut er ein strategiskt týðandi býur fyri báðar teir stríðandi partarnar í Ukraina. Bardagin um býin hevur nú staðið á í fleiri mánaðir.