FNU fegnast um umhvørvisverndarlóg

Umframt samgonguflokkarnar atkvøddi eisini Sambandsflokkurin fyri uppskotinum. 

Uppskotið er meinlíkt uppskotinum, sum undanfarna samgonga legði fyri tingið í mars 2022, við teimum broytingum, sum ein samd rættarnevnd mælti til í áliti sínum í fjør. 

Tá sat Sambandsflokkurin við umhvørvismálum. Hesaferð var tað Ingilín D. Strøm, landsstýriskvinna úr Javnaðarflokkinum, sum legði uppskotið fram.

Samstundis varð eitt uppskot til broytingar í náttúrufriðingarlógini frá 1970 samtykt við aðru viðgerð í tinginum í gjár.

Tey bæði lógaruppskotini hanga saman og verða tí viðgjørd samstundis.

Tann nýggja náttúruverdarlógin hevur nýggjar reglur um skipan av verndarøkjum og vernd av djóra- og plantusløgum, og tí verða friðingarheimildirnar tiknar úr náttúrufriðingarlógini.

FNU fegnast um samtyktina av uppskotinum við aðru viðgerð, og heldur at tann breiða politiska undirtøkan gevur vónir um, at uppskotið kann verða endaliga samtykt í komandi viku.