Altjóða fuglateljingardagur

Føroya Fuglafrøðifelag bjóðar fólki at vera við í Global Big Day og nevnir fuglateljingina "heimsins størsta bólkaarbeiði".

- Tað er lætt at vera við, og øll kunnu luttaka, sigur felagið.

Í 2022 tóku 51.500 fólk í 201 londum lut í Global Big Day, og meira enn 7.600 fuglasløg vóru eygleidd. Í Føroyum vóru 62 fuglasløg eygleidd sama dag í 2022.

Fyri at taka lut í fuglateljingardegnum í dag, skal ein skráseta seg í eBird, brúka nakrar minuttir at eygleiða fuglin, og síðani skriva tal, slag og stað fyri teljingina í dátabasan.

eBird er ein stórur dátabasi við fuglaeygleiðingum, har øll sjálvboðin kunnu leggja sínar teljingar inn. Her ber millum annað til at síggja, hvørji fuglasløg eru eygleidd í Føroyum, nær fuglurin sæst í Føroyum, og nær hann fer av landinum aftur. Eisini ber til at síggja fleiri enn 2.700 myndir av fuglum úr Føroyum.