Tailand: Andstøðan væntar framgongd

Stór valluttøka var á parlamentsvalinum í Tailandi, nú valhølini eru latin aftur. 

Umleið 52 av 65 milliónum íbúgvum í Teilandi hava valrætt, og væntað verður, at andstøðan fær framgongd á valinum í dag.

Fyrsta almenna valúrslitið verður greitt seinni í dag, men endaliga úrslitið verður neyvan klárt áðrenn 13. juli, og fleiri mánaðir kunnu ganga, áðrenn stjórn verður skipað.

Flokkurin Phau Thai, sum ovurríka Shinawatra-familjan stendur á odda fyri, verður helst vinnari á valinum. Oddakvinnan í flokkinum er 36 ára gomlu Paetongtarn Shinawatra, sum er valevni til forsætisráðharrasessin.

Størsti avbjóðari hennara er 42 ára gamli Pita Limja-roen-ratn, sum er formaður í Phak Kao Klai-flokkinum.