Oljunýtslan skrásetast og kannast

Nú skal oljunýtsluna hjá føroyskum fiskiskipum kannast nágreiniliga og skrásetast.

Tað fer granskingarstovnurin Sjókovin komandi trý árini at gera saman við reiðaríum.

Oljan er sera týdningarmikil partur av samlaðu útreiðslunum, og høgi oljuprísurin tyngir um raksturin hjá skipunum. Føroyar hava bundið seg til at minka um útlátið, og fiskiflotin er ein týðandi partur av samlaða føroyska útlátinum.

Eingi almenn útgreinaði tøl eru um oljunýtsluna í føroyskum fiskiskapi, men Sjókovin hevur seinastu árini, í samstarvi við reiðarí, greinað oljunýtsluna í størstu skipabólkunum fyri árini 2019-2022.

Komandi trý árini fara tey so at arbeiða við einari vekætlan, sum byggir víðari á hetta arbeiðið.

Sjókovin skrivar, at Fiskivinnugransking fíggjar verkætlanina saman við eginfígging frá reiðaríum og Sjókovanum.