Magnus Heinason lagdur

Rannsóknarskipið Magnus Heinason er givið við kanningunum fyri í ár. Vanliga plagar skipið at vera í drift til november, men bæði í ár og í fjør hava kanningarnar verið skerdar.

Orsøkin er, at rættiliga stórar umvælingar eru gjørdar, sum eru goldnar av vanligu rakstrarjáttanini. Tí er játtanin uppi nú, hóast nakað er eftir av árinum.

Tá skipið á sumri í 2012 var til klassingar, bleiv avdúkað, at nógvastaðni vóru pláturnar ov nógv tærdar.

Kravt varð, at summastaðni skuldu plátur skiftast beinanvegin. Aðrar kundu bíða til árið eftir.

Umvælingarnar á sumri í fjør kostaðu 2,4 mió kr. og tær sum blivu gjørdar seinasta vetur, kostaðu 1,4 mió kr.

Játtanin, sum skipið fær á fíggjarlógini á hvørjum ári, røkkur til rakstur og vanligt viðlíkahald, men hon klárar ikki so stórar eykaútreiðslur sum hesar.

Tí eru kanningarnar skerdar bæði í fjør og í ár.